देब राना, फोटो पत्रकार
‘ हे विधाता
सक्छस् भने मलाई
चरा बनाई दे
ताकी
म खुल्ला आकाशमा उड्न सकूँ,
हरेक टोलमा पुग्न सकूँ,
हरेक घरमा बस्न सकूँ,
साना साना पात र घुस्यान बटुलेर
मेहनतले आफ्नै सानो गुड बनाउन सकूँ । ’ _ कवि बादल सुरेश
कवि बादल सुरेशले भनेझैँ चरा प्रकृतिका कयौं सुन्दर सिर्जना मध्ये चरा पनि एक हो । चराले आफ्नो कर्म आफ्नो संसार निर्माण गर्छ । त्यसैले पनि होला रंगीन चरा देख्दा सबैको मन मोहित हुन्छ । र, थाहा नदिएर आँखाको बाटो भएर मनमा सुटुक्क बस्छ । र दिलभित्र राज गर्छ । तिनका आवाज सुन्दा मन मुग्ध हुन्छन् । संसारमा कयौं सुन्दर चराचुरुङ्गीहरू छन् ।
‘बर्दिया चराहरूको घर हो’ भन्दा खासै फरक पर्दैन । नेपालमा पाइने आठ सय ९२ प्रकारका चराहरू मध्ये बर्दियामा मात्र पाँच सय १३ प्रकारका चराहरू पाइने गरेको बर्दिया राष्ट्रिय निकुञ्जसँग तथ्याङ्क रहेको छ ।
बर्दियाको कुल क्षेत्रफल दुई लाख दुई हजार पाँच सय हेक्टर मध्ये एक लाख २१ हजार छ सय ८२ हेक्टर जङ्गल भएकोले पनि बर्दिया चराहरूको उपयुक्त बासस्थान हो । त्यसैगरी बर्दियामा हावापानी, वासस्थान लगायतका कारण पनि बर्दिया पाइने चराको संख्या बढी रहेको छ ।
बर्दिया भएर बग्ने कर्णाली नदि, बबई नदी तथा बढैयाताल, च्यामा ताल, लगायतका साना ठूला तालमा वर्षभरी नै पानी पाइने भएकोले पनि बर्दिया चरा घर हो । त्यसैले प्रत्येक घर आँगनबाट सजिलै देख्न पाइन्छ सुन्दर चराहरू । र बदियाको आँगनका बस्छन्, रम्छन् र भुल्छन् सुन्दर चराहरू । बर्दियाको आँगनमा डुल्छन्, यहाँको आकाशमा निर्धक्क उडेको छन् चराहरू ।
मैले आफ्नो क्यामरा केही सुन्दर चराहरूलाई कैद गरेको छु । तीनै सुन्दर चराहरूको संरक्षण, र प्रचारप्रसार गरी अरु पनि देखाउन सकियोस् ।
जय प्रकृति। जय जय संरक्षण ।।