यज्ञप्रसाद सापकोटा
बर्दिया ।
बर्दियाको गुलरिया नगरपालिका वडा नं ३ का हेमराज गोडियाको भारतीय जंगलमा गोली लागि मृत्यु भएको छ । भारतको जंगलमा निउरो टिप्न गएका गोडियालाई अज्ञात व्यक्तीले चलाएको गोली लागी उनको मृत्यु भएको परिवारीक स्रोतले जनाएको छ ।
दायाँ खुट्टामा गोली लागेको उनलाई अस्पताल ल्याउँदै गर्दा मृत्यु भएको प्रहरीले जनाएको छ । विहान करिब १० बजे सिमावर्ती भारतीय जंगलमा निउरो टिप्न गएका उनी साँझ अवेर सम्म फर्केका थिएनन् । बेलुका ८ बजे हेमराज गोडियाले आफ्नी श्रीमती मर्री गोडियालाई फोन गरी आँफु गोली लागि घाईते भएको लिन आउ भनेको बताईन् । खेतमा अर्धबेहोस भएर लडेको अवस्थामा भेट्टाएर ल्याएको उनले बताईन् ।
घरमा ल्याएर पानी खुवाएपछि बेहोस भएकालाई अस्पताल लैजाँदा लैजाँदै मृत्यु भएको मृतककी श्रीमतीले बताईन् । समयमा एम्बुलेन्स नआउँदा अस्पताल लैजान ढिला भएको मृतकका छोरा अंगदकुमार गोडियाले बताए । उनका अनुसार दुई ओटा एम्बुलेन्सलाई फोन गर्दा नेपालगञ्ज भएको बताएपछि तेस्रो एम्बुलेन्समा अस्पतालमा पुर्याएको बताएका छन् ।
बर्दिया अस्पताल अकस्मीक कक्षको रेकर्ड अनुसार राती १० बजेर २० मिनेट जाँदा हेमराज गोडियालाई मृत्यु भइसकेको अवस्थामा अस्पताल पुर्याईएको थियो । गोली लागि अत्याधिक रक्तस्राव भएको कारणले मृत्यु भएको आशंका गरीएको छ ।
बर्दियाका डिएसपी सुर्य सुवेदीले गोली कसले कसरी चलाएको हाल सम्म जानकारी नभएको बताए । उनले भने –‘ घरपरिवारबाट भारीतय जंगलमा निउरो टिप्न गएको बेलामा गोली लागेको जानकारी आएको आधारमा मुद्दा दर्ता गरी अनुसन्धान प्रक्रिया अगाडी बढाएका छौँ । ’ शवको पोष्टमार्टम गरी आफन्तको जिम्मा लगाईएको उनले बताए ।
