प्रकाश पाैडेल/गुलरिया (बर्दिया) ।
बर्दियामा दुई थान पेस्तोल सहित दुई जना भारतीय नागरिक पक्राउ परेका छन् । गुलरिया नगरपालिका– ६ प्रहरी कार्यालय अगाडिको खाजा नास्ता पसलबाट दुई ओटा कटुवा पेस्तोल र नौ राउन्ड पेस्तोलमा लाग्ने गोली सहित भारतीय नागरिक पक्राउ परेका हुन् ।
पक्राउ पर्नेमा भारत बहराइच घोषियाना बस्ने वर्ष २७ का अजय घोष र भारतको बहराइच नानपारा बस्ने वर्ष २७ कै अमरेश कुमार बर्मा रहेका छन् । उनीहरु नास्ता पसलमा नास्ता खाँदै गर्दा पक्राउ परेको प्रहरीले जनाएको छ । उनीहरु हतियार सहित नेपाल प्रवेश गर्नुको कारण भने पत्ता लागेको छैन । उनीहरूलाई जिल्ला प्रहरी कार्यालय बर्दियाले नियन्त्रणमा लिएर थप अनुसन्धान प्रक्रिया अगाडि बढाएको छ । जिल्ला प्रहरी कार्यालयका प्रहरी नायब उपरीक्षक सूर्य प्रकाश सुवेदीले प्रारम्भिक जानकारी लिएर थप अनुसन्धानको प्रक्रिया सुरु गरिसकिएको बताए ।
चोरीमा संलग्न हुन सक्ने आशङ्काको आधारमा प्रहरीलाई खबर गरेपछि प्रहरी गएर खानतलासी गर्दा उनीहरु पक्राउ परेको स्थानीयले बताएका छन् । पछिल्लो समयमा बर्दियामा चोरीका घटना बढिरहेका थिए ।
