बर्दिया(मधुवन)
बर्दियाको मधुवन नगरपालिकामा रहेको सानोश्री सानाकिसान कृषि सहकारी संस्थाले ४३ घरपरिवार व्यवसायिक बाख्रा पालन गर्ने किसानलाई उन्नत जातको बोका वितरण गरेको छ । नेपाल लाइभस्टक सेक्टर इन्नोभेसन आयोजना अन्र्तगत बाख्रापालनमा सहभागी कृषकहरुलाई उन्नत जातको बोयर बोका वितरण गरेको हो ।
सानोश्री सानाकिसान कृषि सहकारी संस्थाले आयोजनाको सहयोगमा बाख्रापालनका लागि ४३ घरपरिवार कृषकहरुलाई अनुदान दिएको छ । उन्नत जातको बोका अनुदानमा उपलब्ध गराएर कृषकहरुको बाख्राको नश्ल सुधार गर्ने उद्देश्यले अनुदानमा उपलब्ध गराएको हो । नेपाल लाइभस्टक सेक्टर इन्नोभेसन आयोजनाको ५० प्रतिशत अनुदान सहयोगमा सानोश्री सानाकिसान कृषि सहकारी संस्थाले चापकटर, दाना पिस्ने मेसिन, बाल्टि, जग, एप्रोन, बुट, लगाएतका सामाग्रीहरु वितरण गरीसकेको छ । त्यसैगरी बाख्राको व्यवस्थीत खोर निर्माण र कम्पोष्ट मल बनाउने स्थानको निर्माण गरीसकिएको छ ।
कृषकहरुलाई व्यवसायीक रुपमा बाख्रापालनमा लगाई उनीहरुको जिवस्तर उकास्ने र मधुवन नगरपालिकालाई खसी बोकाको मासुमा आत्मनिर्भर बनाउने उद्देश्यले बाख्रापालमा अनुदान दिईएको सानोश्रीसानाकिसान कृषि सहकारी संस्थाका अध्यक्ष धर्मराज थापाले बताउनु भयो । उहाँले आगामी दशैँमा कृषकहरुले उत्पादन गरेका खसी बोका खरिद विक्रि गर्ने पाउने विश्वास व्यक्त गर्नु भयो ।
नेपाल लाइभस्टक सेक्टर इन्नोभेसन आयोजनाको सहयोगमा सानोश्री सानाकिसान कृषि सहकारी संस्था लिमिटेडको आयोजनामा २०७८ भाद्र ८ गते देखि बाख्रापालन तथा खसीबोका उत्पादन कार्यक्रम सञ्चालन गरीरहेको छ । सहकारीको प्रस्तावमा ५० प्रतिशत कृषकले बेहोर्ने गरी दुई करोड बराबरको कार्यक्रमको सम्झौता भएको सहकारीका मुख्य प्रबन्धक दयाराम तिवारीले बताउनु भयो । उहाँले ५० जना कृषकहरु बाख्रा पालनका लागि छनौट हुनुभएकोमा हाल ४३ जनाले कार्यक्रम अन्र्तगत बाख्रापालन गरीरहनु भएको बताउनु भयो ।