बर्दिया । बर्दियाको बारबर्दिया नगरपालिका वडा नं. ९ स्थित खैरेनी गाउँको एक घरमा गएराती भएको आगलागीमा परी एक १४ वर्षीय बालकको मृत्यु भएको छ ।
गएराती करिब १० बजेको समयमा भएको आगलागीमा परी १४ बर्षिय बालक दिनेश चौधरीको मृत्यु भएको जिल्ला प्रहरी कार्यालय बर्दियाले जनाएको छ । जस्तापाताको छानो भएको घरमा एक्कासी आगलागी भएपछि घरभित्र एक्लै सुतेका बालक दिनेशको जलेर मृत्यु भएको जिल्ला प्रहरी कार्यालय बर्दियाका सूचना अधिकारी प्रहरी नायब निरिक्षक हेमबहादुर शाहीले बताउनु भयो ।
प्रहरी नायव निरिक्षक शाहीका अनुसार घरमा अचानक आगलागी भएको बेला दिनेशका आमा र बहिनी छिमेकीको घरमा गएको र १४ बर्षिय दिनेश चौधरी घर भित्र एक्लै सुतिरहेका थिए ।
प्रहरी चौकी कतर्निया तथा ईलाका प्रहरी कार्यालय मोतिपुरबाट गएको प्रहरीको टोलीले स्थानीयबासी र दमकलको सहयोगमा आगो नियन्त्रण गरेको शाहीको भनाई छ ।
आगो लाग्नुको कारणबारे अनुसन्धान भैरहेको प्रहरीको भनाई छ ।
