कृष्णसार अनलाइन । बर्दियामा सवारी दुर्घटना रोकथाम तथा न्यूनिकरण जिम्मा पाएको ट्राफिक कार्यालयको भवन नहुँदा प्रशासनिक कामकाजमा समस्या हुने गरेको छ ।
गुलरिया नगरपालिका ८ कोठियागाउँ जिल्ला ट्राफिक कार्यालयको नाममा तीन कठ्ठा जग्गा छ । तर सरकार भवन बनाउन सरकारले बजेट नदिँदा ट्राफिक कार्यालय एउटै कोठाबाट भाडामा सञ्चालन हुँदै आएको छ ।
जिल्ला ट्राफिक प्रहरी कार्यालयका प्रमुख प्रहरी निरीक्षक सन्दीप बेलबासेले ट्राफिक कार्यालयको आफ्नो भवन नहुँदा एउटा कोठाबाट काम संचालन गर्नुपर्ने बाध्यता रहेको बताउनु भयो । उहाँले भन्नुभयो, ‘कार्यालयको आफ्नो भवन नहुँदा कार्यालय दिने सेवा प्रवाहमा समेत असर पारेको छ । सवारी दुर्घटना परेको सवारी साधन राख्नका लागि ठाँउको अभाव छ भने कार्यालयमा कार्यालय प्रमुखको कार्यकक्ष छैन । कार्यालयमा आवश्यक पर्ने शाखाहरू छुट्टाछुट्टै छैन।’
जिल्लामा सवारी दुर्घटनाको अवस्था हेर्दा प्रत्येक वर्ष दुर्घटना बढ्दै गएको देखिन्छ । आर्थिक वर्ष ०८२/८३ को मंसिरसम्म सडक दुर्घटनामा १९ जनाको मृत्यु, २६४ जना शक्त घाइते, तीन सय १४ जना सामान्य घाइते भएको छन् । त्यसैगरी गत आर्थिक वर्ष ०८१/८२ मा परी ३८ जनाको मृत्यु, ७५ जना शक्त घाइते, ६ सय ८३ जना सामान्य घाइते भएको छन् भने आर्थिक वर्ष ०८०/ ८१ मा २६ जनाको मृत्यु, ६२ जना शक्त घाइते, ३७ जना सामान्य घाइते भएको जिल्ला ट्राफिक कार्यालयका प्रहरी नायब निरीक्षक तथा सूचना अधिकारी राघवसिंह राठौरले जानकारी दिनुभयो ।
कार्यालयसँग सीमित स्रोतसाधन छ भएकाले दुर्घटना परेका सवारी साधन राख्ने ठाउँको अभाव छ ।अर्कोतिर कार्यालयको जग्गा प्रयोग बिहिन अवस्थामा रहेको छ । ट्राफिक कार्यालय वर्षेनि करिब एक करोड बराबरको राजस्व सङ्कलन गर्ने गरेको छ ।
