कृष्णसार अनलाइन । बर्दियाको गुलरियामा रहेको घरेलु तथा साना उद्योग कार्यालयको भवन निर्माणको काम पाँच वर्षदेखि अलपत्र परेको छ । समयमा निर्माण कम्पनीले काम नगर्दा घरेलु तथा साना उद्योग कार्यालयको भवन निर्माणको काम पाँच वर्षदेखि अलपत्र परेको हो ।
घरेलु तथा साना उद्योग कार्यालयका कार्यालय प्रमुख इन्द्रराज खत्रीले अमन कन्स्ट्रक्सन गुलरियाले कार्यालयको भवन निर्माणको ठेक्का ०७७ फागुन २० गते प्राप्त गरेको जानकारी दिनुभयो । उहाँले भन्नुभयो, ‘सम्झौताअनुसार निर्माण कम्पनीले भवन निर्माणको काम ०७८ असार १५ गते सक्नुपर्ने थियो । तर, निर्माण कम्पनीले समयमा काम नगर्दा भवन निर्माणको अधुरो रहेको छ।’
निर्माण कम्पनीले भवन निर्माणको ठेक्का ६० लाख ८८ हजार ७२५ रुपैयाँमा प्राप्त गरेको थियो । अहिलेसम्म काम गरेबापतको ३४ लाख ४५ हजार ६९३ रुपैयाँ भुक्तानी निर्माण कम्पनीले लिएको कार्यालयले जनाएको छ ।
निर्माण कम्पनीले भवन निर्माणको काम गर्ने भन्दै पटकपटक म्याद थप गर्ने, तर काम नगर्ने परिपाटीले गर्दा कार्यालयको भवन अलपत्र परेको छ । निर्माण कम्पनी अहिले कार्यालयको सम्पर्कमा आएको छैन । भवन निर्माणको काम परेको छैन । निर्माण कम्पनीले भवन निर्माण समयमा पूरा नगर्दा कार्यालय भाडाको घरमा बस्न बाध्य भएको छ ।
