प्रकाश पौडेल, गुलरिया ।बर्दियाको ठाकुरबाबा नगरपालिकामा रहेको ठाकुरबाबा आधारभूत नगर अस्पतालमा हाडजोर्नी तथा नशा रोग विशेषज्ञ डा. लक्ष्मण सिग्देलले निःशुल्क स्वास्थ्य सेवा प्रदान गर्दै आउनु भएको छ ।
भेरी अस्पताल नेपालगञ्जमा कार्यरत डा. सिग्देलले आफ्नो बिदाको समय सदुपयोग गर्दै महिनाको तेस्रो शनिबार ठाकुरबाबा आधारभूत नगर अस्पतालमा आएर बिरामीको स्वास्थ्य परीक्षण तथा उपचार सेवा प्रदान गर्दै आउनु भएको हो । अन्य दिन बाँकेको भेरी अस्पताल नेपालगञ्जमा बिरामीको उपचार गर्ने भए पनि बिदाको दिन पारेर ठाकुरबाबा नगर अस्पतालमा सेवा दिन आउने गरेको डा. सिग्देलले बताउनु भयो ।
उहाँले भन्नुभयो, ‘ ठाकुरबाबा नगरपालिका नजिककै मधुवन नगरपालिका मेरो घर हो । घर नजिकको पालिका रहेको अस्पतालमा आएर हाडजोर्नी तथा नशा सम्बन्धी बिरामीको उपचार गर्न पाउँदा एक किसिमको सन्तोष प्राप्त हुन्छ । अन्य बिदा भेरी अस्पतालमा बिरामी हेर्छु । कम्तिमा पनि महिनाको १ पटक भएपछि गाउँघरको साथीभाइ भेटघाट हुने र बिरामी उपचार पनि गर्न पाइने भएको महिना एक दिन यहाँ आउने गरेको छु।’
