बर्दिया ।
बर्दियाको गुलरिया बजारमा वनडढेलो नियन्त्रणका लागि सचेताना जगाउन प्रभातफेरी गरिएको छ । डिभिजन वन कार्यालय बर्दियाको समन्वयमा सामुदायिक वन उपभोक्ता महासंघ (फेकोफन) बर्दियाको आयोजनामा प्रभातफेरी कार्यक्रमको आयोजना गरीएको हो ।
वनलाई डढेलो लाग्नबाट जोगाऔँ भन्ने मूल नारा सहित जिल्लाका सरोकारवाला निकाय र सामुदायिक वनका अभियन्ताहरूले प्रभातफेरी कार्यक्रमको आयोजना गरेका हुन् । कार्यक्रममा प्रमुख जिल्ला अधिकारी, नेपाल प्रहरी प्रमुख, सशस्त्र प्रहरी प्रमुख डिभिजन वन कार्यालयका प्रमुख फेकोफनका केन्द्रिय सदस्य, फेकोफन बर्दियाका अध्यक्ष, सामुदायिक वन उपभोक्ता समुहका अध्यक्ष तथा पदाधिकारीहरू र विभिन्न सामुदायिक वनका उपभोक्ताहरूको उपस्थिति रहेको थियो ।
समुदायमा सचेतना फैलाउनका लागि आयोजना गरिएको कार्यक्रममा बोल्दै प्रमुख जिल्ला अधिकारी नारायण प्रसाद रिसालले नेपालमा वनमा आगलागी हुनुमा मानिवय कारण नै बढि हुने भएकोले समुदायमा सचेताना फैलाउनु पर्ने बताउनु भयो । वनमा आगो लागि सकेपछि निभाउनु भन्दा पनि आगो लाग्न नदिनका लागि नै पहल गर्नुपर्ने बताउनु भयो । केही गरी वनमा डढेलो लागिहालेमा सुरु कै अवस्थामा नियन्त्रण गर्नका लागि सम्बन्धित निकायहरूले एकअर्कामा सूचना पुर्याउनु पर्ने बताउनु भयो ।
डिभिजन वन कार्यालय बर्दियाका प्रमुख प्रविण बिडारीले सामुदायिक वनका उपभोक्ताहरूले वन डढेलो नियन्त्रणका लागि ठुलो भूमिका खेल्दै आएको बताउनु भयो । उहाँले वन डढेलोले अल्पकालीन रुपमा र दीर्घकालीन रुपमा हुने क्षतिको बारेमा सबै सचेत भई यसलाई नियन्त्रण गर्नु पर्ने बताउनु भयो । सामुदायिक वन उपभोक्ता महासंघ बर्दियाका अध्यक्ष शर्मा चौधरीले सामुदायिक वनका उपभोक्ताहरूले आफ्नो वन जोगाउनका लागि डढेलो नियन्त्रणमा खटिँदै आएको बताउनु भयो ।
बर्दिया जिल्लामा गत वर्ष करिब एक हजार हेक्टरमा वन डढेलो लागेको थियो । जसमा साना रूखबिरुवामा क्षति पुगेको जिल्ला वन कार्यालयको तथ्याङ्क रहेको छ ।
