यज्ञप्रसाद सापकोटा
बर्दिया ।
बर्दियाको मधुवन नगरपालिकाकी एक महिलाको बाघको आक्रमणबाट मृत्यु भएको छ । मधुवन नगरपालिका वडा नं ३ बस्ने ५५ बर्षिया कली बंसी मगरलाई घर नजिकैको सम्झना सामुदायिक वनमा घाँस काट्न गएको बेलामा बाघले आक्रमण गरेको थियो । सामुदायिक वन खाता जैविक मार्गमा पर्दछ ।
घाँस काट्न गएकी अबेरसम्म नफर्किएपछि आफन्तहरू खोजबिन गर्न करिब एक बजे वनमा गएका थिए । उनको कपडा च्यातिएको अवस्थामा भेटिएपछि नजिकैको शशस्त्र प्रहरीको टोलीलाई खबर गरेर थप खोजी गरिएको थियो । उनको साँझ ५ बजे शव घटना स्थलबाट केही पर बाघले दायाँ हात खाएको अवस्था फेला परेको डिभिजन वन कार्यालय बर्दियाका सूचना अधिकारी द्रोणराज शर्माले बताउनु भयाे ।
मृतक कलीको शव पोस्टमार्टमका लागि बर्दिया अस्पतालमा लगिएको छ । विगत देखि नै यस क्षेत्रमा बाघको आक्रमणबाट मृत्यु हुनेको संख्या बढ्दो छ । गत चैत्र ६ गते दाउरा काट्न गएको समयमा खाता जैविक मार्गमा दुई जना महिलाको बाघको आक्रमणबाट मृत्यु भएको थियो ।
