प्रकाश पौडेल/ दिनेश ठाकुर , गुलरिया । तराईको जिल्ला भएपनि बर्दिया जिल्लामा अझै पनि विद्युत विस्तार हुन सकेको छैन भन्दा अचम्म लाग्ला तर यो सत्य हो । बर्दियाको सदरमुकाम गुलरिया नगरपालिकामा नै हाल सम्म विद्युतको उज्यालो पुग्न नसकेका गाउँ रहेको छ ।
गुलरिया नगरपालिका वडा नं १० लड्कनीयामा हाल सम्म पनि विद्युतको लाइन बिस्तार हुन सकेको छैन । १६ घरधुरी रहेको लड्कनीयामा विद्युत लाइन बिस्तार हुन नसक्दा अझैपनि अँध्यारोमा बस्न बाध्य रहेका छन् ।
खरको छाना र खरकाे टटियाले बारेको घर भएको सो गाउँमा आर्थिक अवस्था कमजोर भएका घरपरिवार बस्ने गर्दछन् । यो बस्ती सिमा स्तम्भबाट लगभग एक सय मिटरको दूरीमा रहेको छ । दिनरात नेपालको सिमानाको रक्षा गर्ने स्थानीयलाई स्थानीय तह लगायतका अन्य सरोकारवाला निकायले समेत बेवास्ता गरेको छन् ।
सदरमुकाम नजिक रहेको लड्कनीया गाउँमा सामान्य आधारभुत सेवा पुग्न सकेको छैन । खानेपानी, विजुली, सडकको राम्रो व्यवस्थापन छैन् । नजिकैको गाउँमा रहेका टाठाबाठा, राजनीतिमा पहुँच भएका व्यक्तिहरूले आफ्नो जग्गा र खेतबारीमा समेत विजुलीको लाइन बिस्तार गरेको लड्कनीयाका ४१ वर्षीया बिध्धी गोडिया बताउनु हुन्छ ।
चुनावको बेला नेताहरूले भोट माग्न आउँदा बिजुली ल्याइदिने, खानेपानीको बिस्तार गर्ने, सहज रुपमा मल बीउ उपलब्ध गराउने, बाटो बनाइदिने आश्वासन दिएपनि चुनाव पछि फर्केर नआउने गरेको गोडिया बताउनु हुन्छ ।
वडा अध्यक्षलाई विजुलीको पोल र तारको व्यवस्थापन गरी दिन पटक पटक आग्रह गर्दा पनि सुनुवाइ नभएको गोडियाले बताए । उहाँले भन्नुहुन्छ, ‘ विद्युत कार्यालयमा गएर पोल माग गर्नका लागि आग्रह गर्दा वडा अध्यक्षले आफू व्यस्त भएको बताउनु हुन्छ । त्यही भएर विद्युत कार्यालयसम्म जान सकेको छैन। ।’
विद्युतको पहुँच नहुँदा बालबालिकाको पठनपाठनमा असर परेको सोही स्थानमा बसोबास गर्ने ३७ वर्षीय दयाराम गोडिया बताउनु हुन्छ । बालबालिका विद्यालयबाट आएपछि बस्तुभाउ हेर्न जान्छन् , घर फर्कँदा साँझ पर्छ । सोलारले पनि राम्रोसँग काम गर्न छोडेकोले उज्यालोमा पढ्न पाएका छैनन् । विद्युत अभावमा बालबालिकाहरूको पढाईमा समेत असर परेको छ ।
१६ घरहरू मध्ये लड्कनीयामा १० घरपरिवारको जग्गा समेत छैन् । भने ६ घर परिवारको नाममा जग्गा रहेको छ । आफ्नो पुर्खौली सम्पत्ति केही नभएका ४० वर्षीय गोपाल हरजनलाई विजुली बति बाल्न पाउने आस छैन् । उहाँ भन्नुहुन्छ, ‘ अन्त सबैतिर बत्ति छ, उज्यालो छ । तर यहाँ बिजुलीको पोल र तार केही आएको छैन् । अर्काको जग्गामा घर बनाएर बसेको छु, मैले बति बाल्न पाउछु र ?’
गुलरिया नगरपालिका वडा –१० का वडा अध्यक्ष लक्ष्मी नारायण लोधले वडा कार्यालयले पाँच लाख रकम पोल र तारको लागि बजेट विनियोजन भएको हुँदा लड्कनीयामा विजुलीको लाइन बिस्तार गर्ने बताउनु भयोे ।
विद्युत प्राधिकरण वितरण केन्द्र गुलरियाका प्रमुख नारायण अर्यालले लड्कनीयामा विद्युतको लाइन बिस्तारका माग गर्न कोही नआएकोले यस बारेका कार्यालय जानकारी नभएको बताउनु भयो । उहाँले पोल, तार, ट्रान्सफर्मर र मिटर नभएको कारण कोही पनि बत्ति बाल्नबाट बञ्चित नहुने बताउँदै लड्कनीयामा तिहार अघि नै सर्वे गरेर विद्युतको लाइन बिस्तार गर्ने बताउनु भयो । अन्य स्थानमा पनि विद्युत लाइनको बिस्तार नभएको भए कार्यालयमा जानकारी गराए विद्युत विस्तार गरिने बताउनु भयो ।
ऐलानी जग्गा वा अरुको जग्गामा बसोबास गर्नेहरूलाई वडाको सिफारिसको आधारमा विद्युत मिटर उपलब्ध गराउने व्यवस्था रहेको प्रमुख अर्यालले बताउनु भयो ।
