प्रकाश पौडेल, गुलरिया । बर्दिया राष्ट्रिय निकुञ्जले एकसिँगे गैँडाको अनुगमन तथा स्वीप अप्रेसन सुरु गरेको छ । खाता जैविक मार्ग तथा गेरुवा कर्णाली भँगालोको आसपासमा निकुञ्जले गैँडाको अवस्था तथा सङ्ख्याको गणना गर्न स्वीप अप्रसेन सुरु गरेको हो ।
बर्दिया दोस्रो ठुलो संख्यामा गैँडा रहेको छ । निकुञ्जले गत आर्थिक वर्षको पुष देखि जेठसम्म कर्णाली नदी तटीय क्षेत्र र बबई उपत्यकामा गैँडाको बासस्थानको अनुगमन गर्दा कर्णाली नदी तटीय क्षेत्रमा ३६ वटा गैँडा र बबई उपत्यकामा २ वटा गैँडा फेला पारेको निकुञ्जले जनाएको छ ।
बर्दिया राष्ट्रिय निकुञ्जका बरिष्ठ संरक्षण अधिकृत डाक्टर अशोक राम बर्दिया गैँडाको अवस्था के छ भनेर अनुगमन गर्न लागिएको बताउनु भयो । उहाँले भन्नुभयो, ‘ निकुञ्जभित्र चोरी सिकार भएको छ वा छैन् भनेर हेर्ने तथा जनावरहरू कतै पासोमा पारेको छ ही भनेर हेर्ने हो । त्यसको साथै गैँडाको सङ्ख्या कस्तो छ भनेर गेरुवा देखि लालमाटीसम्म क्षेत्र अनुगमन गरिने छ ।’
अनुगमन बर्दिया राष्ट्रिय निकुञ्ज, डिभिजन वन कार्यालय बर्दिया, राष्ट्रिय प्रकृति संरक्षण कोष, निकुञ्जको सुरक्षामा खटिएको नेपाली सेनाले सयुक्त रुपमा अनुगमन सुरु गरेको छ । गैँडा अनुगमनको काम १५ दिनसम्म हुने निकुञ्जको कार्यालयले जनाएको छ ।
